Showing posts with label CCTV. Show all posts
Showing posts with label CCTV. Show all posts

Sunday, 19 June 2016

தூத்துக்குடி மீன்பிடி துறைமுகத்தில் கண்காணிப்பு கேமரா: தமிழகத்தில் முதல் முறையாக நடவடிக்கை

தமிழகத்தில் முதல் முறையாக தூத்துக்குடி மீன்பிடித் துறைமுகம் கண்காணிப்பு கேமராக்கள் வளையத்துக்குள் கொண்டு வரப்படுகிறது. இதற்காக கண் காணிப்பு கேமராக்கள் பொருத்தும் பணி நடைபெற்று வருகிறது.

தமிழகத்தில் உள்ள பெரிய மீன்பிடித் துறைமுகங்களில் தூத்துக்குடி மீன்பிடித் துறைமுக மும் ஒன்று. இங்கு 250 விசைப் படகுகள் நிறுத்தப்பட்டு மீன்பிடித் தொழிலில் ஈடுபட்டு வருகின்றன. தினமும் சரசாரியாக 300 டன் வரை மீன்கள் பிடித்து வரப்படுகின்றன. இந்த மீன்கள் ரூ. 1 கோடி முதல் ரூ. 1.5 கோடி வரை ஏலம் போகின்றன.

மேலாண்மைக் குழு
தூத்துக்குடி மீன்பிடித் துறை முகத்தில் மாவட்ட ஆட்சியர் ம. ரவிக்குமாரின் தீவிர முயற்சி யால், தமிழகத்திலேயே முதல் முறையாக மீன்பிடித் துறைமுக மேலாண்மைக் குழு அமைக்கப்பட்டது. துறைமுகத்தில் உள்ள அனைத்து சொத்துக்கள் மற்றும் பராமரிப்பு பணிகள் அனைத்தும் 29.5.2013 முதல் மீன்பிடித் துறைமுக மேலாண்மைக் குழு வசம் ஒப்படைக்கப்பட்டன.
மாவட்ட ஆட்சியர் தலைமை யிலான ஆலோசனைக் குழு, மீன்வளத்துறை இணை இயக்குநர் தலைமையிலான மேலாண்மைக் குழு ஆகிய இரு குழுக்கள் மீன்பிடித் துறைமுகத்தின் அனைத்து பணிகளையும் கவனித்து வருகின்றன.

ரூ. 2 கோடி சேமிப்பு
மீன்பிடித் துறைமுகத்தில் நிறுத்தப்படும் படகுகளுக்கான வாடகை, இருச்சக்கர வாகன நிறுத்துமிட வருமானம், கேன்டீன் வாடகை, படகு பழுதுபார்க்கும் பட்டறை வாடகை என மீன்பிடித் துறைமுக மேலாண்மைக் குழுவு க்கு பல்வேறு வகையில் வருவாய் கிடைக்கிறது.
கடந்த 3 ஆண்டுகளில் குழுவின் சேமிப்பு ரூ. 2 கோடியை எட்டியுள்ளது. மீன்பிடித் துறைமுகத்தில் நடை பெறும் அனைத்து மேம்பாட்டு பணிகளுக்கும் இந்த சேமிப்பு நிதியில் இருந்தே செலவு செய்யப்படுகிறது. இதன் காரணமாக சிறு சிறு பணிகளுக்கு அரசை நம்பியிருக்காமல், மேலாண்மைக் குழு நிதியில் உடனுக்குடன் செய்ய முடிகிறது.

விடிய விடிய பரபரப்பு
மீன்பிடித் துறைமுகத்தை பொறுத்தவரை இரவு முழுவதும் விடிய விடிய பரபரப்பாக காணப்படும். அதிகாலை 5 மணிக்கு மேல் படகுகள் கடலுக்கு மீன்பிடிக்க புறப்பட்டுச் செல்லும். இரவு 9 மணிக்கு மேல் படகுகள் கரை திரும்பும். அதன் பிறகு படகுகளில் பிடித்து வரும் மீன்கள் அதிகாலை வரை ஏலம் விடப்படும்.
மீன்களை வாங்குவதற்கு கேரளா உள்ளிட்ட பல்வேறு பகுதிகளில் இருந்து வியாபாரிகள் வருவார்கள். இதனால் இரவு நேரத்தில் மீன்பிடித் துறைமுகம் சுறுசுறுப்பாக நடைபெறும்.

கண்காணிப்பு கேமரா
மீன்பிடித் துறைமுகத்தில் நடைபெறும் சிறு சிறு மோதல் சம்பவங்கள், திருட்டு உள்ளிட்ட சமூக விரோத செயல்கள் மற்றும் சில விரும்பத்தகாத சம்பவங்களை தடுக்க மீன்பிடித் துறைமுகத்தில், மேலாண்மைக் குழு நிதியில் கண்காணிப்பு கேமராக்களை பொருத்த மாவட்ட ஆட்சியர் ம.ரவிக்குமார் அறிவுறுத்தினார். அதன்படி தமிழகத்தில் முதல் முறையாக இங்கு கண்காணிப்பு கேமராக்கள் பொருத்தும் பணி தற்போது நடைபெற்று வருகிறது.

9 கேமராக்கள்
இது தொடர்பாக அதிகாரிகள் கூறும்போது, மீன்பிடித் துறைமுக வளாகத்தில் 9 கண்காணிப்பு கேமராக்கள் பொருத்த முடிவு செய்யப்பட்டுள்ளது. தற்போது 5 கேமராக்கள் பொருத்தப்பட்டுள்ளன. மீன்பிடித் துறைமுகத்தின் மையப் பகுதியில் துறைமுகம் முழுவதும் கண்காணிக்கும் வகையில் ஒரு சுழலும் கேமரா பொருத்தப் படவுள்ளது.
இதற்காக உதவி இயக்குநர் அலுவலகத்தில் கட்டுப்பாட்டு மையம் அமைக்கப்பட்டுள்ளது. அங்கிருந்து துறைமுக வளாகத் தில் நடைபெறும் அனைத்து சம்பவங்களையும் கண்காணிக்க முடியும்.

Thursday, 26 May 2016

பெண்கள் பாதுகாப்பு; பஸ்களில் சிசிடிவி கேமராக்கள், ஜிபிஎஸ்: மத்திய அரசு அறிவிப்பு

மத்திய நெடுஞ்சாலைப் போக்குவரத்துத் துறை அமைச்சர் நிதின் கட்கரி பேருந்து ஒன்றில் பெண்களுக்கான பாதுகாப்பு ஏற்பாடுகளை கவனிக்கிறார். | படம்: பிடிஐ.
நாடு முழுவதும் பெண் பயணிகளின் பாதுகாப்பை உறுதி செய்ய பொது போக்குவரத்து பேருந்துகளில் கண்காணிப்பு கேமராக்கள், ஆபத்து கால அழைப்பு பொத்தான்கள், ஜிபிஎஸ் நிறுவப்படுவது கட்டாயமாக்கப்படும் என மத்திய சாலை மற்றும் போக்குவரத்து துறை அமைச்சர் நிதன் கட்கரி தெரிவித்துள்ளார். 

டெல்லியில் புதனன்று நடந்த நிகழ்ச்சி ஒன்றில் நிதின் கட்கரி கூறியதாவது:

நிர்பயா சம்பவத்தை தொடர்ந்து நாடு முழுவதும் பெண்களின் பாதுகாப்பு உறுதி செய்யப்படுவது மிகவும் அவசியமானது. எனவே அனைத்து பொது போக்குவரத்து பேருந்துகளிலும் கண்காணிப்பு கேமராக்கள், ஆபத்து கால அழைப்பு பொத்தான்கள் மற்றும் ஜிபிஎஸ் கருவிகள் நிறுவப்படுவது கட்டாயமாக்கப்படும். 

இதற்கான மத்திய அரசின் அறிவிக்கை வரும் ஜூன் 2-ம் தேதி வெளியிடப்படும். ராஜஸ்தான் மாநில போக்குவரத்து கழகத்தில் சோதனை ரீதியாக இந்த நடைமுறைகள் பின்பற்றப்பட்டது. அதில் வெற்றி கிடைத்திருப்பதை அடுத்து, நாடு முழுவதும் இந்த திட்டத்தை அமல்படுத்த முடிவு செய்துள்ளோம். 

பேருந்தில் செல்லும் ஒரு பெண்ணிடம் யாரேனும் தகாத முறையில் நடக்க முயற்சித்தால், உடனடியாக அவர் அங்குள்ள ஆபத்து கால அழைப்பு பொத்தானை அழுத்திவிட்டால் போதும். அந்த அழைப்பு ஜிபிஎஸ் வழியாக அருகில் உள்ள காவல் நிலையத்துக்கு தானாகவே செல்லும். 

மேலும் பேருந்தில் உள்ள கண்காணிப்பு கேமராவும் அங்கு நடக்கும் காட்சிகளை பதிவு செய்து மத்திய கட்டுப்பாட்டு அறைக்கு நேரலையாக அனுப்பும். அதை வைத்து அந்த பேருந்தை உடனடியாக பின்தொடர்ந்து சென்று, பாதிக்கப்பட்ட பெண்ணை பத்திரமாக காப்பாற்ற முடியும்.