Showing posts with label space. Show all posts
Showing posts with label space. Show all posts

Saturday, 16 July 2016

செயற்கைக்கோளுக்கு மாற்று சோலார் ட்ரோன்!


பழையன கழிதலும் புதியன புகுதலும் அறிவியலில் சகஜம். அந்த வகையில் ‘செயற்கைக்கோள்களுக்கு மாற்றாக அதன் வேலைகளைவிட அதிக வேலைகளைச் செய்யும் திறன்கொண்ட ட்ரோன்களைப் பயன்படுத்தலாம்’ என்பது ஏர்பஸ் நிறுவனத்தின் புதிய கண்டுபிடிப்பு. அப்படி என்னதான் புதியதில் உள்ளது? பார்ப்போமா...

ஐரோப்பிய விமான நிறுவனமான ஏர்பஸ் புதிய கண்டுபிடிப்புகளுக்கு சளைக்காத ஒன்று. அண்மையில் 3டி பிரின்டிங் முறையில் எலெக்ட்ரிக் பைக் ஒன்றையும், சிறிய வகை விமானம் ஒன்றையும் உருவாக்கி சாதனை செய்தது. தற்போது ‘ஸெஃபைர் டி’ (Zephyr T) எனும் சூரிய சக்தியில் இயங்கும் ட்ரோன் விமானம் ஒன்றை வெற்றிகரமாக இயக்கி அறிவியல் வரலாற்றில் தனது பெயரை அழுத்தமாகப் பதிவு செய்துள்ளது. 

ஏர்பஸ் நிறுவனத்தின் சோலார் ட்ரோன்கள் தற்போது விண்வெளியில் செயற்கைக்கோள்கள் செய்யும் அனைத்து பணிகளையும் செய்யும். குறிப்பிடத்தக்க விஷயம், ‘மிகக் குறைவான செலவில் செய்யும்’ என்பதுதான்.

இதனை இந்த நிறுவனத்தினர் ‘போலி செயற்கைக்கோள்கள்’ என்று அழைக்கின்றனர். இதனை செயற்கைக்கோள்களைக் காட்டிலும் அதிக காலம் செயல்பட வைக்க முடியும். தொழில்நுட்ப மேம்பாடு, பேட்டரி உள்பட சில சிக்கல்களுக்கு இதனைத் திரும்ப பூமிக்கு வரவழைத்து, பழுது பார்த்து, மீண்டும் அனுப்பவும் முடியும் என்பது கூடுதல் பிளஸ் பாயின்ட்டுகளாக உள்ளன.

2008ம் ஆண்டே ஏர்பஸ் நிறுவனம் இதற்கான ஆராய்ச்சிகளைத் தொடங்கி விட்டது. 2010ம் ஆண்டு ‘ஸெஃபைர் 7’ எனும் ட்ரோனை 14 நாட்கள் இடைநிறுத்தாமல் எரிபொருள் நிரப்பாமல் வானில் சுற்றிவரச் செய்தது உலக சாதனையாக பதிவாகியுள்ளது. இந்த ட்ரோன்களை ராணுவ கண்காணிப்பு, அவசரகால தொலைத்தொடர்பு, அதிவேக இணையம் உள்ளிட்ட பணிகளுக்கும் பயன்படுத்திக்கொள்ள முடியும்.

விண்வெளியில் காலாவதியான செயற்கைக்கோள் கழிவுகள் தொடர்ந்து அதிகரித்து வட்டப்பாதையில் சுற்றி வரும் நிலையில் இதுபோன்ற புதிய முயற்சிகள் அந்த ஆபத்தை பெருமளவு குறைக்கும். 

Wednesday, 6 July 2016

வியாழனின் சுற்று வட்டப்பாதையில் நுழைந்தது நாசாவின் 'ஜூனோ'!

படம்: நாசா

நாசா விஞ்ஞானிகள் அனுப்பிய ஜூனோ விண்கலம் வெற்றிகரமாக வியாழன் கிரகத்தின் சுற்று வட்டப்பாதையில் நுழைந்தது.

இது, சூரிய குடும்பம், கிரகங்கள் உருவான விதம் உள்ளிட்டவை குறித்து ஆராய்வதற்கான மிகப் பெரிய வாய்ப்பாக கருதப்படுகிறது.

வியாழன் கிரகத்தைப் பற்றி ஆய்வு செய்வதற்காக அமெரிக்காவின் நாசா விஞ்ஞானிகள் 1.1 மில்லியன் செலவிட்டு ஜூனோ விண்கலத்தைத் தயாரித்தனர்.

இந்த விண்கலம் புளோரிடா மாகாணத்தில் உள்ள கேப் கேனவெரல் விண்வெளி மையத்தில் இருந்து 2011, ஆகஸ்ட் 5-ம் தேதி விண்ணில் செலுத்தப்பட்டது.

தொடர்ந்து 5 ஆண்டுகளாகப் பயணித்து 290 கோடி கி.மீ. தூரத்தைக் கடந்த இந்த விண்கலம் சமீபத்தில் வியாழன் கிரகத்தின் காந்தப்புலத்தில் வெற்றிகரமாக நுழைந்தது.

இதைத் தொடர்ந்து, வியாழன் கிரகத்தின் சுற்று வட்டப்பாதையில் ஜூனோ விண்கலம் இன்று வெற்றிகரமாக நுழைந்தது. இதை மகிழ்ச்சியுடன் நாசா விஞ்ஞானிகள் கொண்டாடினர்.

வியாழன் கிரகத்தின் வளையங்களிலுள்ள கதிரியக்கத் தன்மை குறித்து ஆராயவும், வியாழன் கிரகம் எப்படி உருவானது, ஒட்டுமொத்த சூரிய குடும்பமும் எப்படி இயங்குகிறது என்பது குறித்து ஜீனோ தொடர்ந்து ஆராய்ச்சி செய்யும் என்று நாசா விஞ்ஞானிகள் தெரிவித்துள்ளனர்.